P - usò’y nagágalák, na kayó’y mákitâ,
      kahit samandali, tayo’y magkásama,
      ditô sa Statesman, ng magkákilala,
      ating pinágyaman, mga aláala.

H - ubád ang katulad, sa runong ay salát,
      sa’ting mga gurô, ay magpásalamat,
      silá ang tumulong, sa matá’y nágmulat,
      dî mapápantayán, ang kaniláng hirap.

I - bá’t ibáng nayon, ang pinánggalingan,
    ng magkitákità’y, waláng káalamán,
    ugali’y hinutok, saká tinuruan,
    nitóng mga guro, sa’ting páaralán.

L - umipas ang araw, taón ay nagdaán,
      itóng mga aklát, ang nagíng libangan,
      ng makátapos na’y, hanap kapalaran,
      lungsód ng Maynila, ang siyáng pinuntahán.

I - sipa'y hinubog, sa dalúbhasaán,
     at ng makátapos, nilisan ang bayan,
     malakás ang loób, waláng gunam-gunam,
     ibáng kabíhasnán, ang pinároonan.

P - anatag ang loób, sa pakíkibaka,
      sa ibayong dagat, hirap ay binatâ,
      bagong kasárinlán, ditô ay kaibâ,
      sa nagisnan nating, buhay na masayá.

P - atnubay ang dasál, sa lahát ng galáw,
      kimî ang págkilos, sapagkát dayuhan,
      malakî ang takot, anóng makákamtán,
      malakás ang loób, waláng makapitan.

I - sáng bagay lamang, aming kahilingan,
     itóng mga gurô’y, huwág kákalimutan,
     silá ang nágpunla, nitóng karunungan,
     ang ating inani, ay magandáng buhay.

N - ais natin ngayón, na magkità kità,
      sa apat na araw, tayo’y magsásama,
      walâ na ang takot, walâ ng pangamba,
      responsabilidad, nati’y natapos na.

E – to kamî ngayón, na may pánawagan,
      sa mga káklaseng, mabuti ang buhay,
      nawâ ay pakinggán, itóng kahilingan,
      ang aming proyekto, sana’y suportahan,

S – aán háhanapin, itóng nawáwalâ,
      mga kamág-arál, ibá’y nahíhiya,
      tanging nilálayon, at aming adhika,
      ang kayó’y makità, maká salamuha.

T – akót yaríng pusò, guló ang isipan,
      kung makíkilala, nitóng kamág-arál,
      at higít sa lahát, kami’y alinlangan,
      pagkát saradô na, itóng paaralán,

A - ting sariwain, gawíng págbalikán,
      ng nág-áaral pa, sa'ting páaralán,
      mga aláala’y, dî dapat pumanaw,
      sa pusò at diwâ, magpá waláng hanggán.

T – igíb ng ligaya, ng kayó’y makitâ,
      hindî akalaíng, inyo pang kilalá,
      mga gintong bagay, na aming nakuha,
      ito ay ginamit, upang guminhawa.

E - wan kung totoo, hindî namin alám,
      parang náulila, aming pakiramdam,
      itóng mga guró’y, máagang lumisan,
      ibá’ng kamág-arál, dî nakapághintay.

S – aradô na ngayón, itóng páaralán,
      lahát ng gunitá’y, náglahong túluyan,
      mga aláala, nitóng kábataan,
      walâ na ngâ walâ, walâ ng naiwan.

M - ayróng tinátawag, iná ng tahanan,
       at sa páaralán, gurô ang s’yáng gabáy,
       aming pasálamat, sana ay pakinggán,
       ang nagíng tulong n’yó’y, dî malílimutan.

A – ng malungkot ngayó’y, ang paghíhiwaláy,
      nitóng nágdiriwang, mga kamág-arál,
      ang aming dalangin, sana ay pakinggan,
      na maulit mulî, itóng págdiriwang.

N - gayóng saradô na, itóng páaralán,
      sa’ting aláala’y, gunitá na lamang,
      ditô ay nagtamô, nitóng karunungan,
      dî dapat limutin, Philippine Statesman.